Bitoriano Gandiaga

Literatur idazlanak

GDA^

Gabon dut anuntzio
desinteresatu;
Eguberri poza dut
nahi erregalatu:
Gabon-Eguberrien
berria haizatu,
doan dadin jendea
munduan gozatu.

Gabon ta Eguberri (1)
ditut aldarrigai,
Belengo berri ona
dakarkit gozagai! [gozakai!]

Ez dut anuntziatzen (2)
merkatuko gairik,
ez naiz komertziante
sinestedun baizik.
Dakardan merkantzia,
hain dakart doanik [dohainik],
nahi duenak har beza
konpromezu barik.

Gabon ta Eguberri
ditut aldarrigai,
Belengo berri ona
dakarkit gozagai! [gozakai!]

Gabon-pozaren karga
dakarkit Belendik,
Eguberriren karga
gozoa dakarkit:
Jainkoa haur egin da
guganatu nahirik
zenbat maite gaituen
agertzeagatik.

Gabon ta Eguberri
ditut aldarrigai,
Belengo berri ona
dakarkit gozagai! [gozakai!]

1983

Gaia 1: Gabonak
Edizio kritikoa: Paulo Agirrebaltzategi
Gipuzkoa.net-aren logoa