Literatur idazlanak
ABG-1^
Euskadin erdaldun eta
euskaldun gara bizi;
nabarmen ageri denez,
erdara da nagusi;
noiznahi entzun dezakezu
zein-nahi tokitan kausi;
erdarak ez du beldurrik
zertan adierazi.
Euskadin erdaldun eta
euskaldun gara bizi,
erdara furfuriatsu*,
euskara iharrausi*;
dakitenek ez dakiten
hainbesterekin nahasi,
euskarak badu beldurrez
zertan egin garrasi.
Euskadin erdaldun eta
euskaldun gara bizi,
erdara agitz aberats,
euskara lar biluzi;
euskarak lortu txanpona
du erdarak ikusi,
aberatsa bekaiztu da,
txanpona du gutizi.
Euskadin erdaldun eta
euskaldun gara bizi,
euskalduna saiatu da,
erdara du ikasi;
erdaldun gutxi da berriz
euskararatzen hasi,
bizikidetasunetik
nahi gaituzte iraitzi [iraizi].
Edizio kritikoa: Paulo Agirrebaltzategi
