Literatur idazlanak
JML^
Arantzazu ederra da
zein kanpotik zein barrutik;
Arantzau ederra da.
Barrutik miresgarria,
zoragarria kanpotik. (1)
Kanpotik zoragarria
Arantzazu; zer paisaia
gertutik zein asagotik*:
orografia artega,
landareria zardaia*!
Landareria zardaia,
harkaitz gabeko lurretan,
landareria zardaia!
Tartean haitz erraldoiak
kararrien zilarretan.
Arantzazu zein kanpotik
zein barrutik, ederra da
edozein ikuspuntutik.
Kanpotik gustagarria,
barrutik gustu bera da:
Lehenengotik erakartzen
zaituen arkitektura
zaizu galanki azaltzen,
amaren etxe nasaiko
sukalde handi modura.
Sukalde handi modura,
barru hedatsu prestuan,
argiluna ta lilura;
eta giro atsegina,
bakezko xarma puntuan.
Ohol epela da nagusi
sapaiz, lurzoruz, absidez,
ohol epela da nagusi;
eta margoen mandatu
erlaxagarria airez.
Beirateek fin eralgia,
kolorezko musika da
argilunean argia,
gorteiatuz askotara
birjinaren irudia.
