Literatur idazlanak
Ik. Olerkiaren konposizio grafikoa .pdf formatuan
AOB^
Arantzazun badugu
jada arbola bat
bakearen arbola
deitzen dioguna.
Urriak hogeita lau. Asko bildu gara
Arantzazun, Asisko Espirituaren
harira jarduteko, bakearen alde,
otoitzaldi beroan. Elizkizunean
bakearen ikurtzat erabili dugun
pago landare leuna, berberaxe dugu,
bakearen arbola izena ezarriz,
Arantzazun landatu dugun pagotxoa. [I]
Suetenaren pozak
eraginik, aurten
bakea ikusi dugu
eratzen, ernetzen
eta miragarriro
landare bihurtzen.
(Landare ahul oraindik, tratu goxo baten
beharrean oraindik, alde batekoen
ta bestekoen kontu anaikorrenaren
arreta etengabea arrenka eskatzen,
bake sortu berria, oraindiokarren,
txikar baita, eta hauskor, gaxte eta mengel).
Suetenetik hara, azkenik noizbaiten, (1)
behingoz gerturatu den noizbaita edertzen
hona, pozgarri, aurten, alai eta lerden,
uste ez genuena poliki gauzatzen,
amets-bidean gora
non argi datorren
bake sortu berria
landaretxo baten
graziaz eta gatzez
aideaz jabetzen,
hazbidean ederki
eta azkar garatzen,
bizipoz betearen
abarrak zabaltzen,
itxaropenez eta
ilusioz eder.
Arantzazun badugu
jada arbola bat
bakearen arbola
deitzen dioguna. [II]
