Literatur idazlanak
ARAN^
Kurtzipizion, Kristoren [I]
irudi hartan begiak
jarri dituenez gero,
bihotz konfiatuz dator
elizara erromesa.
Jadanik Kristok onartu
duela irudi zaio,
barkatua dagoela,
eta alai eta gozo (1)
heldu da Arantzazuko
Andre Mari, Jainkoaren
Ama santuarengana,
Kristoren lagun, Kristoren
adiskide bat bezala. (2)
Leku baztertuan eta
bide zurtz baten ertzean,
hemen dago Santo Kristo
bere ermita zaharrean,
isilak inguraturik,
gehienetan bakarrean.
Behinola ez zen honela,
alderantziz zen orduan,
erromesek xede zuten
erromesaldi santuan;
gaur errepidetik urrun
inork ez dauka kontuan.
Burdinazko babesa du
ermitak ate-leihoa,
erretaula ilunean
bistaratzen da Kristoa,
ostiral santu gainean
ikusaraziz Pazkoa.
Kristo, bidaldiko lagun,
bideburuko promesa.
Kristo, hain ezaguna eta
aldiberean sorpresa.
zein zaren abegitsua,
zein zaren delikadeza!
Aurpegi narez, begiak
zerura dituzularik,
gurutzea urka baino
jainko-tronu duzularik,
gozo zu, bake sakona
gozoro darizularik.
Onartzen duzu bisitan
hurbiltzen zaizun guztia
eskainiz besterik gabe
zeure itxura eztia,
denentzat zaude zabalik
,
denentzat duzu astia.
Zure aurrean badago
esker onaren zantzurik,
badago lore iharrik,
argizaririk, txanponik,
garatxodunek edo eta
jende debotek utzirik. [II]
Behin honaino helduz gero
eta zu ikusten jarri,
edonork aurkitzen zaitu
gozo eta tratagarri,
kontenplazio geldian
gelditzeko geragarri.
Kurtzipizioko Kristo,
apala eta eztia,
Kalbarioko hila ta
Pazkoako eguzkia,
estimatzen dugu zure
zur landuzko argazkia. [III]
