Literatur idazlanak
AOB^
Eta lagunak agertzen naute
lagun artean: "Es vasco y escribe bertzos".
Hori da nire karnet guztia.
Nire lagunak baskoak dire
ta maite naute, (baina erruki zerbait didate).
"Escribe bertzos" ez da titulu
ez da diploma bat ere.
Eta Madrilen basko den batek
nola behar du lotsarik gabe
baskorik abal gehiago gabe
lagun artean agertu?
Ezertxo maite ez dudan Txomin
del Regatoren esaldiren bat
jaulkitzen dute lagun berriok
gizajo honi eder egite aldera.
(Madarikatzen dut Txomin hori
bai eta trufaz dioen guztia;
eta inori gure kontura
egiten dion grazia).
O, Dulzinea
Lorentza Aldontza dela ta parre
dagizun jendez haserre zera, Kixote!
Har zazu ezpata bai, baina oraingoan
atera zaite Lorentza Aldontza beraren hondra
onaren alde.
Nik maite dudan izaki hari
nahiz Dultzinea deitzen dioten [deritzoen]
ala Lorentza, ez dit ardura.
Baina ezpataz sekula erten
beharrik banu deituragatik,
Lorentza Aldontza izena behinik
defendituko nuke nik.
