Literatur idazlanak
UBM-1^
Erabili izan dudan idazkeraz damutzen ez banaiz ere, ezagutuz noan errealitate hiritarra adierazteko gauza litzaidakeen hizkuntza idoro nahi nuke. Dakidan euskara nahikoa izan dut orain artean idatzi izan dudanetarako eta nahikoa nuke idatzi izan ez dudan beste zenbait arlotarako.
Baina hemen, mugimen koloretsu azkar hau abiadan eta margo bizkorrez adierazteko ezindurik aurkitzen naiz. Gauzen izenetatik hasita, jendearen lasterdurazko bizitza, berrien ugaritasun nahastekatua-ta, nola eman gertatzen diren nabardura askotariko eta saltaritan ?
Hizkuntzari errurik egotzi baino lehen, neure burua aztertu behar dudala otu zait. Agian ez naiz gauza bizitza giro hontaz aritzeko. Gelditasunezko aire batetan hiru-lau zeren ikuste ta ausnartze bare batetan bizi izan naiz, eta orain gainez ere egiten dit hemengo ikustearen askotasun urduri honek.
Etxeko asto kateatua erabiltzen badakit, baina ez larreko behorrak nahi dudanera erakartzen.
Bestalde zenbat jabetu izan naiz euskaraz beraz? Zenbat gaitan landu izan dut? Zer irakurri izan dut euskaraz hiri bizitzari buruz?
Hirikoz aritzeko euskararik behar izango ote nuenik ere ez zait otu izan gainera. Hirian erdaraz egiten da. (1)
Errazena litzaidakeen arren, hizkuntzari ezin diezaioket errurik egotzi. Nahikoa egiten dit gajoak gauzak esateko ezpainetaratzen zaidanean, lumaren puntaraino iristen zaidanean Madrilen irudia emateko borondate hain bizkorrez.
