Literatur idazlanak
AAP^
Burdinazko oian hontaz
ezin dut oraindik idatz
indarrez zait mintzo
goraka sendo
gruazko txirrio
tximeneazko
fundiziozko
giro matxinada
aidekoz.
Gero ilun uzten nau zeru
gorri ta zikinaren aurrean
makina ez izatearen penaz.
Txirriken abarrotsa
nabari dut oroitzapenean.
Erretratu bila nabil
erdoi eta ke kolorez harkaitzei
jario oi darien metal-zeta
ugerraren bila.
Nere hitzaren bila nabil
Lutxanako moile zikinean
Nerbion ibaiko ur loietan
gabarretako txatarra zahar artean
Bizkaiako arbasoek galdu zidaten
hitza
ta banabil euritan
burdina industriaren oian hontan
euskaldun nekazari huts
baino besterik ez izatearen penaz. [I]
Atzerriko hizkuntza balitzait
belarriak zorroztuz zerbait
ulertzen ote dudan begira
Jainkoari arrabiaz deituz
hitza sor dezaidan eske
larri gor eta mutu egin nauelako
erdizka bakarrik gizon euskaldun.
Norbaitek adieraz lezaidake
zer dioten txirriken
txirriborroek burdinaren erreinu
ketsu eta gorri hontan.
Baina ez dut ulertzen hemengo
gizon beztuen mintzaira bera ere
ta larriagotzen naiz.
Ez dut agian nahikoa pentsatu
hizkuntza gogor honen zentzutan.
Baina ez dut beste penarik ere
ola zarretan jaio zen hizkuntza
ta ola berrietan hazi dena
ez ulertzearena baino.
