Literatur idazlanak
L2G^
Gaur hemen nauzu, Zabala,
zuri nire diosala! (bis)
Heldu-lekurik sobera duzu,
nahiz-ta tirante azala,
luzea bezain zabala,
ez zara bostgarren txahala.
Historia zaharra duzu
atzokoa ez zara zu [atzoko ez bai zara zu]. (bis)
Baina burua lehengo lepotik
adaburutzen bait zaizu,
hala erizten bazaizu,
lehena huts dezaket, aizu.
Aspaldiz honuntz eginez,
mintza nadin zuk eginez: (bis)
Libru bat duzu zure aitaso
Fernando zeritzaionez, [I]
gero, beste bat ere ez,
aurrena ondu beharrez.
Gaztaroan idazlari,
Umotzean idazkari; (bis)
ez ote zara txangurro gisa
atzerantz joaten ari?
Zure alea lehen gari,
begira olotzeari!
Irakurle amorratu,
bista duzu izorratu. (bis)
Hobe zenuke txorientzako
ortuan azak jorratu.
Zertan hainbeste lorratu?
Bista, behintat, ez borratu.
Fotin-zale, naturista,
deskalabrodun ziklista, (bis)
ikusten duzu zertarako den
libru-jalearen bista?
Non zen zabalenik pista,
hantxe bai zinen despista.
Organu-jole, musiko,
orfeo berebiziko, (bis)
teklak ez ezik tonuan sartzen
ditu fraile ta mutiko;
serio zaizu ariko
partituraren hariko.
Goizetik jaikitzen baita
ez dakit orduko gaita. (bis)
Frai Manuelek goraipatzen du [II]
zeina balu bere aita,
ez seguru Peilok [sic] nahita,
ez bai du maite gogaita.
Amezketatik jalkia,
Fernandoren igalia, (bis)
Arantzazuko Santutegian
lurra hartuta jarria,
bromaaldien sukarria,
ez du txarra oinarria.
Filologo arras bortitz
zatitzen du edozein hitz; (bis)
eman dezagun hartzen duela
azterketa-gaitza bizitz,
laister dio dela biz-hitz,
hitza besterik ez balitz.
Sortzen duen guztiz, lasai,
dibertitzen da nolanahi. (bis)
Ernegarazten gaitu, hor dabil
trankilontzi, prakalasai,
berak hasi, berak jarrai,
broma dariola darrai.
Hasi ta ezin amaitu,
luzaz nahi nuke jarraitu, (bis)
baina, halere kontakizunak
etenaldi bat on baitu,
abotsa dezadan bahitu,
inor ez dadin gogaitu.
