Literatur idazlanak
GRZ^
Maiatzak 17
San Paskual
I
Paskual santu geurea,
xaloa eta xumea,
zein benetakoak zure
otoitza eta fedea.
Guraso txiroen seme,
guraso zintzoen xede,
jainko-legean zintuzten (1)
eskolatu, batez ere.
Eginkizun apaletan,
ardi zaintzen larreetan,
gogotsu aritzen zinen
espirituzko gaietan.
Munduan zeunden oraindik: (2)
inon bazen arazorik,
zugana ekartzen zuten
epailetzat zeu harturik. (3)
Ondasunik behar aina (4)
eskaini zizuten, baina
dena utziz, fraide joan
zinen, Jaunak eragina.
Garbi ta egiazale,
Birjina_Amaren maitale,
Eukaristia da zure
nahi bizienen seinale.
Zein emana otoitzari (5)
eta otoitz-giroari;
zein egina Jainkoaren
aurrean bizitzeari!
Behartsu eta eriak
zugana ziren guztiak;
bazuen denentzakorik
zure erruki handiak.
Paskual santu geurea,
apala eta xumea;
iguzu landu ditzagun
otoitza eta fedea.
Aitari aintza ta Seme
gizon eginari ere, (6)
aintza Espirituari
betierez betiere.
Amen.
